Dövlət Neft Fondunda MHŞT || üzrə Çoxtərəfli qrupun iclası keçirilib

İyunun 29-da Azərbaycan Respublikası Dövlət Neft Fondunda (ARDNF) Mədən Hasilatı üzrə Şəffaflıq Təşəbbüsünün (MHŞT) Azərbaycanda tətbiqinə dair çoxtərəfli qrupun növbəti iclası keçirilib.

İclas zamanı iştirakçılar Azərbaycanın MHŞT prosesi çərçivəsində növbəti qiymətləndirmə prosesi və 2015-ci il üzrə MHŞT Proqres hesabatını müzakirə ediblər.

ARDNF-nin ictimaiyyətlə əlaqələr şöbəsindən verilən məlumata görə, iclas iştirakçıları həmçinin Azərbaycanın hasilat sənayesində fəaliyyət göstərən yerli və xarici şirkətlərin Azərbaycan Respublikası hökumətinə ödənişləri və Azərbaycan Respublikası hökumətinin yerli və xarici şirkətlərdən daxilolmaları barədə 20, 21, 22-ci hesabatı (2015, 2016, 2017-ci illər üzrə) tutuşduraraq təhlil edəcək müstəqil administrator (auditor) şirkətinin seçilməsi məqsədilə keçirilən təkliflər sorğusunun nəticələrini müzakirə ediblər.

Çoxtərəfli qrup növbəti üç il üçün yerli və xarici hasilat şirkətlərindən əldə edilmiş məlumatların toplanması və tutuşdurulmasının “Mur Stivens” şirkəti tərəfindən keçirilməsinə qərar verib.

İclasda mədən hasilatı sənayesində benefisiar sahiblik məlumatlarının açıqlanmasına dair yol xəritəsinin hazırlanması məqsədilə hüquqi məsləhət xidmətlərinin göstərilməsi üçün “Beyker ənd MakKenzi” şirkəti seçilib.

MHŞT xüsusi çoxtərəfli və şirkətlər, hökumətlər, sərmayəçilər və vətəndaş cəmiyyəti təşkilatları tərəfindən dəstəklənən könüllü təşəbbüsdür. MHŞT neft, qaz və mədən hasilatı sahəsində şəffaflığın təmin edilməsində qlobal standartdır. Azərbaycan MHŞT prosesinə 2003-cü ildə qoşulmuşdur. MHŞT-nin tətbiqi sahəsində əldə etdiyi nailiyyətlərə görə Azərbaycana “2009-cu il MHŞT mükafatı” təqdim edilib.

neftfondbina

Share